يوميات شاب موكوس

كلمتين ونص

الكلمتين: لما بدأت أكتب «يوميات شاب موكوس» ماكنش نفسي أعمل كتاب لقراء الكتب فقط، لكن كان نفسي أعمل كتاب يقراه كمان الناس اللي مابتحبش قراية الكتب، اللي همَّ عمرهم ما كملوا كتاب لآخره، واللي أنا كنت واحد منهم من سنتين.. كان نفسي الأفكار اللي تدخل دماغ القارئ، تكون أكتر من الكلام المكتوب، يمكن لأن كراهيتي للقراءة -في وقت من الأوقات- كانت بسبب كتب وزارة التربية والتعليم اللي كان كلامها كتير، وما كنتش بطلع منها بحاجة!... ما كنتش بحلم أعمل كتاب ياخد أيام في قرايته، لكن كنت عايز أعمل كتاب يتقرى في أقل من ساعة، بس اللي يقراه، يرجع يقراه من تاني.

النُص: مفيش حد فينا ماجربش مرة يمسك قلم أزرق ويشخبط بيه على أي ورقة يلاقيها.. يكتب اسمه أو اسم حد بيفكر فيه.. يرسم وردة.. يرسم قلب بسهم.. أو كلمة «love» مجسّمة .. والنتيجة النهائية بتكون ورقة كلها شخابيط زرقــا.. والغريب إن الورقة دى بيكون ليها نفس الشَكل عندنا كلنا.. أنا بقى بنفس الطريقة، عملت شخابيط لكل يومية من يوميات كتابي.

أحمد عاطف مجاهد